No encontro aprobáronse as contas do ano 2024, nas cales a Fundación rexistrou novamente superávit, cunha cifra de 64.495€, e unha facturación que superou os 3,9 millóns de euros. Resultados dun exercicio no que tiveron lugar 19 eventos maiores e 25 menores, ademais das sesións da Central Agropecuaria de Galicia ABANCA, que con 39.625.775€ aumentou as súas transaccións nun 17,4% respecto ao ano anterior e volveu rexistrar o maior volume de facturación da súa historia.
Por outra banda, no encontro fíxose balance das actividades destes primeiros seis meses do ano, nos cales se celebraron 11 eventos maiores e 10 menores, ademais de 22 sesións da Central Agropecuaria de Galicia ABANCA.
Respecto a estas citas do primeiro semestre, son destacables os resultados da 47ª Abanca Semana Verde de Galicia, a máis internacional dos últimos vinte anos e a mellor dos últimos 18 en canto a expositores directos, con 758 empresas e entidades, ademais de recibir 112.200 visitantes, un 32% máis que o ano pasado e a mellor cifra dende antes da pandemia. Tamén medraron o certame agropecuario Abanca Cimag-GandAgro, con 174 expositores que supuxeron un 3,5% máis que na anterior cita e 19.813 visitantes que significaron unha concorrencia un 4,3% maior, e a feira de seguridade, defensa e emerxencias Sedexpo, a cal chegou aos 99 expositores, un 19,2% máis e aos 4.016 metros cadrados netos, un 11% maior.
Por outra banda, foron salientables os datos da Central Agropecuaria ata a poxa do pasado martes 17 de xuño, sendo moi superiores tanto en asistencia como en transaccións respecto á mesma data do ano pasado. Así, ata esta sesión asistiron 29.212 animais, un 24,7% máis que os rexistrados a estas alturas en 2024, mentres que as transaccións ascenderon a 28.471.021€, un 74% máis. Ademais, neste período a Central acadou sete récords en canto a cifras nunha sesión, relativos á facturación conxunta, transaccións en cada unha das categorías e prezos medios tamén en todas as categorías.
Segundo semestre con gran actividade
A notable actividade da Fundación nesta primeira metade do ano continuará tamén na segunda. Así, xa están fixadas diversas citas, entre elas a feira do transporte de viaxeiros por estrada ExpoBus Iberia, que terá lugar en novembro, ou a party informática XGN Intermax, que se celebrará en outubro. Así mesmo, acollerá distintos eventos realizados por outras entidades, como Equina, a Galican Agility Cup ou o Campionato Galego de Formación Profesional, GaliciaSkills 2025.
