Organizado pola asociación Galician Agility Festival en colaboración coa empresa galega de obstáculos para agility Galican Sport, incluirá a primeira quíntupla en territorio galego, é dicir, cinco días de competición. De martes a sábado pola mañá celebraranse probas puntuables para o campionato de España. Xa o sábado pola tarde, terá lugar a Copa Galican, cuxos premios ascenderán a 15.000€ en produtos da empresa.
Estas probas serán avaliadas por catro xuíces top a nivel mundial que destacan por deseñar circuítos seguros para os cans e ao mesmo tempo con gran vistosidade, os cales son a alemá Stefannie Semkat, o sueco Jocke Tangfelt, o canario Héctor Ramírez e o suízo Philipp Glur. Nomes que son un gran reclamo para os profesionais e afeccionados ao agility e que supoñen que ata o momento xa se inscribiron (os prazos aínda están abertos) máis de 250 binomios de 19 países, como son España, Portugal, Francia, Alemaña, Reino Unido, Países Baixos, Bélxica, Polonia, República Checa, Luxemburgo, Italia, Suíza, Estados Unidos, Arxentina, Colombia, Brasil, Panamá, Chile e Singapur.
A estas competicións sumaranse distintos seminarios, os cales serán impartidos por recoñecidos nomes deste deporte canino, como son a francesa Kim Barreau, a italiana Verónica Odone, a alemá Dani Fischbach e o español Adrián Bajo, actual campión do mundo de agility en categoría “large”.
O recinto, epicentro do agility
Da man da asociación Galican Agility Festival a Feira Internacional de Galicia ABANCA acolleu este ano importantes citas co agility, como seminarios, a Cuáduple Canedupo e as probas celebradas na feira Abanca Semana Verde.
Agora, cunha cita estrela tanto por relevancia como por cifra de participantes e carácter internacional, o recinto converterase en epicentro deste deporte canino. E farao coas mellores condicións, xa que as súas instalacións son excelentes para iso, incluíndo un gran ring verde que para celebrar a Galican Agility Cup se dividirá en tres pistas e un ring de quecemento no que se realizarán os seminarios, ademais de multitude de espazos e servizos.
