En marcha o salón Auto Classic, ao que se unirá mañá Motor Show e numerosas actividades

Silleda, 8 de abril de 2022.- A Feira Internacional de Galicia ABANCA  abriu esta mañá  as  portas dunha atractiva cita co motor que se iniciou  co salón Auto Classic  e que sumará a partir de mañá  tanto o certame Motor Show Galicia como un completo programa de actividades. Permanecerá  aberto ata o vindeiro domingo.

Auto Classic, centrado nos  vehículos clásicos,  conta  xa no recinto con exposición  e  venda de coches  antigos,  ademais de todo tipo de pezas  para restauración  e  outras empresas relacionadas.

Motor Show Galicia  comezará  mañá, cos  vehículos de competición como protagonistas. Poderase   adquirir todo tipo de equipamento  para  estes coches, dende  rodas ou lamias ata equipos de música ou  produtos para   abrillantamento.  Tamén  haberá  servizos relacionados, como contratación de seguros.

Un atractivo programa

Estas citas do motor, organizadas por  Sac   Events, celebrarán a fin de semana numerosas  e vistosas actividades. No interior do  pavillón 2 do recinto,  onde se situará a exposición,  haberá  circuítos tanto de coches  teledirixidos como de  scalextric   e  tamén  campionato de simuladores de condución.

En canto  ao exterior, celebraranse  exhibicións de  carcross,  ás 16.00h de mañá    e ás 17.00h do domingo,  e de  drift  (condución as altas velocidades con espectaculares  manobras) ás 12.00h de mañá  e ás 18.00h de ambos os días.

Tamén nestas dúas  xornadas  haberá  xincana de vehículos clásicos, ás 17.15h de mañá e ás 12.00h do domingo, con premio dun seguro de coche en cada sesión. O espectáculo de  Josete   Stunt, no que se poderán  ver  arriscadas acrobacias  e trucos con quads, unha moto  e unha bicicleta,  terá lugar ás 19.30h na  primeira das xornadas  e ás 16.00h na segunda. Uniranse  demostracións de  graffitti, ás 16.45 h de mañá e ás 16.30h do domingo.

O horario destes certames estenderase  de 11.00h a 20.30h. En canto  ao  prezo da entrada,  hoxe é de 7 euros,  mentres que a fin de semana será conxunta para ambos os  salóns  e  custará 10 euros.
 
© 2020 Feira Internacional de Galicia ABANCA - Avda. Recinto Feiral S/N. 36540 Silleda - Pontevedra - España
Tfno (34) 986 577000 - Fax (34) 986580865 - Email: info@feiragalicia.com
Horario de atención ao público: de luns a xoves de 9 a 14 e de 15 a 18 horas. Venres de 8 a 15 horas