Silleda, 23.11.2017.- A Feira Internacional de Galicia ABANCA participa estes días no certame portugués Concreta, o cal se celebra dende hoxe ata o vindeiro domingo 26 de novembro no recinto Exponor, situado en Porto.
Coa súa presenza expositiva nesta Feira Internacional da Construción para unha Rexeneración Urbana Sostible, na que o ámbito enerxético ten un importante peso, a entidade feiral continúa a promoción que está a levar a cabo da Feira da Enerxía de Galicia en distintos eventos da Península.
En Concreta, e tamén na Mostra de Material Eléctrico e Electrónica (Eléctrica) que se celebra de forma paralela, difundirase a imaxe da feira entre expositores e visitantes e establecerase contacto coas empresas que concorren a esta edición dos certames lusos.
Esta participación enmárcase no convenio entre a Feira Internacional de Galicia ABANCA e o Instituto Enerxético de Galicia (INEGA), mediante o cal, entre outras accións, se está a dar difusión á II Feira da Enerxía de Galicia en distintos certames relacionados con este sector. Este acordo xa supuxo a súa presenza tamén con stand no salón valisoletano Expobiomasa o pasado mes de setembro e contempla unha visita comercial ao certame Egética, que se celebrará en Valencia os días 29 e 30 deste mesmo mes.
Feira da Enerxía de Galicia
A II Feira da Enerxía de Galicia, apoiada polo bos resultados acadados na súa primeira convocatoria, está a traballar nunha cita que pretende potenciar a súa exposición, que volverá a contar coa presenza de todos os sectores enerxéticos, e tamén ampliar o seu programa de actividades.
Entre os eixos principais desta edición, que se celebrará do 22 ao 24 de marzo, estará a bioenerxía, o aforro e eficiencia enerxética e os combustibles alternativos para sectores difusos (transporte, agricultura e gandería, residuos…).